Forbhreathnú: roghanna oideachais agus oiliúna

B’fhéidir gur mhaith leat leanúint le cúrsaí oideachais nó páirt a ghlacadh i gcúrsa oiliúna chun do scileanna a fhorbairt nuair atá tú dífhostaithe. Is féidir leat é seo a dhéanamh laistigh de chóras foirmiúil na scoile agus an choláiste nó lasmuigh.

Tá roinnt clár leanúnacha oideachais agus oiliúna maoinithe ag FÁS, na coistí gairmoideachais, agus ranna agus gníomhaireachtaí Rialtais eile.

Tugann cúrsaí oiliúna FÁS deis duit do scileanna a fhorbairt nó a uasghrádú sna hearnálacha tráchtála agus tionsclaíocha má tá siad dífhostaithe nó a bpost caillte acu de bharr iomarcaíochta.

Ní gá duit cáilíochtaí foirmiúla a bheith agat chun páirt a ghlacadh i mórán cúrsaí lánaimseartha agus páirtaimseartha atá ar fál sna hearnálacha oideachas aosach agus oideachas pobail.

Is féidir le breisoideachas agus oideachas tríú leibhéal nó oideachas agus oiliúint leantach a bheith san áireamh le cúrsaí oideachas aosach. Tá cúrsaí páirtaimseartha agus lánaimseartha san áireamh sa raon cúrsaí atá ar fáil. D’fhéadfadh cúrsaí a bheith ann i rith an lae nó sa tráthnóna.

Is é atá i gceist le hoideachas pobail ná oideachas agus foghlaim aosach, taobh amuigh d'earnáil an oideachais fhoirmiúil de ghnáth Cuireann oideachas pobail foghlaim phearsantaithe agus solúbthacht chun cinn laistigh den ghrúpa foghlama. Glacann rannpháirtithe páirt mar chomhpháirtithe comhionanna le riachtanais a aithint, cláir a dhearadh agus a chur i bhfeidhm, agus iad a chur in oiriúint ar bhonn leanúnach.

Má tá suim agat i staidéar nó oiliúint bhreise, tá roinnt foinsí eolais faoi fhilleadh ar oideachas a deir níos mó leat faoi chúrsaí a bheadh ar fáil duit.

Tá foinsí éagsúla de mhaoiniú oideachais ar fáil. Áirítear leo siúd deontais, liúntais oiliúna agus íocaíochtaí leasa shóisialaigh cosúil leis an Liúntas um Fhilleadh ar an Oideachas. Tá roinnt coinníollacha ceangailte leis an Liúntas um Fhilleadh ar an Oideachas, lena n-áirítear go raibh tú dífhostaithe ar feadh tréimhse ama áirithe.

Tá an clár Fostaíochta Pobail (FP) deartha chun cabhrú le daoine atá dífhostaithe go fadtéarmach, i measc daoine eile, chun filleadh ar obair trí shocrúcháin poist bunaithe i bpobail áitiúla a thairiscint ar bhonn páirtaimseartha agus sealadach. Tá líon teoranta folúntas Fostaíochta Pobail ar fáil. Tá coinníollacha ann freisin, a bhaineann le cúrsaí aoise agus an cineál íocaíochta leasa shóisialaigh atá á fháil agat.