Áiteanna tríú leibhéal do dhaoine dífhostaithe

Eolas

Beidh 2,500 áit pháirtaimseartha tríú leibhéal do dhaoine dífhostaithe, ar atá fógraithe sa Bhuiséad Forlíontach in Aibreán 2009 - cuirfear tús leis an bpróiseas i Meán Fómhair 2009. Faoin scéim beidh 1,500 áit ar chúrsaí fochéime agus 1,000 áit ar chúrsaí iarchéime. Díreoidh na cúrsaí ar dhaoine a chur ar ais ag obair trí bhreisoiliúint nó athoiliúint. Tá na cúrsaí fochéime sna hearnálacha gnó, eolaíochta, innealtóireachta agus teicneolaíochta. Is féidir teacht ar tuilleadh sonraí faoin scéim ar láithreán gréasáin na Roinne Oideachais agus Eolaíochta.

Is clár gníomhachtaithe leis an margadh saothair atá i gceist atá á reáchtáil i gcomhar leis An Roinn Oideachais agus Scileanna, An Roinn Fiontar, Trádála agus Nuálaíochta (RFTN) agus leis an Údarás um Ard-Oideachas (ÚAO). Cuirfidh RFTN maoiniú ar fáil le haghaidh na háiteanna fochéime agus déanfaidh ÚAO na háiteanna iarchéime a mhaoiniú.

Cúrsaí fochéime

Baineann na háiteanna fochéime le raon cúrsaí teastais agus céime a ghnóthaíonn cáilíochtaí ag leibhéil 6, 7 agus 8 ar Chreatoibre Náisiúnta na gCáilíochtaí (CNC). Beartaítear 1,500 áit a chur ar fáil do dhaoine a bhfuil cáilíochtaí acu ag leibhéal 4, 5 nó 6 go príomha.

Cúrsaí iarchéime

Cuirtear áiteanna ar fáil do chéimithe ar chúrsaí dioplóma iarchéime páirtaimseartha nó ar chúrsaí tiontaithe.

Rialacha

Chun a bheith incháilithe do cheann de na cúrsaí sin, ní mór duit bheith dífhostaithe agus:

• Sochar Cuardaitheora Poist (SCP) nó Liúntas Cuardaitheora Poist (LCP) a bheith faighte agat ar feadh 6 mhí an 1 Meán Fómhair 2009

Nó

• I dteideal na híocaíochta iomarcaíochta reachtúla agus íocaíochta leasa shóisialaigh ábhartha

Tá tú in ann do SCP nó LCP a choinneáil faoi Rogha Páirtaimseartha an Chláir um Fhilleadh ar an Oideachas. Má fhaigheann tú áit faoin scéim seo caithfidh tú a bheith ar fáil agus ag lorg oibre go dáiríre. Tá tosaíocht ag an riachtanas a bheith ar fáil chun oibre ar thinreamh an chúrsa i gcásanna go dtagann siad salach ar a chéile. Má fhaigheann tú post, ní gá duit na táillí cúrsa don bhliain sin a íoc.

Tá na cúrsaí 1 go 4 bhliain de ré. Toisc gur cúrsaí páirtaimseartha atá i gceist, ní bheidh tú incháilithe do dheontas cothaithe an oideachais tríú leibhéal nó don Liúntas um Fhilleadh ar an Oideachas.

Rataí

Ní bhaineann aon táillí teagaisc leis na cúrsaí, ach d'fhéadfadh go mbeadh iallach ar mhic léinn iarchéime táille ainmniúil a íoc.

Conas iarratas a dhéanamh

Tá liosta cúrsaí fochéime agus liosta cúrsaí iarchéime ar fáil ar an suíomh gréasáin Qualifax. Más mian leat iarratas a dhéanamh ar áit chúrsa, ba chóir duit dul i dteagmháil díreach leis an choláiste. Glacann na coláistí iarratais suas go meán Lúnasa. Beidh sonraí na cúrsaí ar fáil i Lúnasa.

Tosóidh na cúrsaí i bhfómhar 2009. Tá sonraí na gcúrsaí ar fáil ón oifig FÁS agus oifig leasa shóisialaigh áitiúil.